1Cor 6 | MHL | STEP | Aria opor oko maiyem, ni Yeesus teeria mua-ko mua oko opora-pa wuau naep Yeesus teeria kakeniw me niam maakeman, ni-ko yia kakenomaka, naep me maeman. Ni iikirap wi sisin mua, Mua Maneka opora me ookimik nain wiar ikiweman. Naap me onowa nain ni naap onaman.

1 Corinthians 6

Wi Yeesus teeria opora-pa me wiam wuowa-ke

1 Aria opor oko maiyem, ni Yeesus teeria mua-ko mua oko opora-pa wuau naep Yeesus teeria kakeniw me niam maakeman, ni-ko yia kakenomaka, naep me maeman. Ni iikirap wi sisin mua, Mua Maneka opora me ookimik nain wiar ikiweman. Naap me onowa nain ni naap onaman. 2 Ni fain-ko me amisareman-i? Ikoka ni Mua Maneka teeria-ke miiwa fain iiwawun urufami mua wia pupep mekawowen. Ni naap eliw onowen, nain aakisa ni opora lawil muuta niar imenarek nain moram naep feenap maiman, “I yiam kakenowa me pepek,” naemi sisin mua wiar ikiwiman. 3 Ni fain pun me amisareman-i? Ikoka i Yeesus teeria-ke wi ensel pun wia urufami wia mekawiyen. Naeya i aakisa miiwa-pa fan ikemik nain maa mutumut eliw yiam kakeniyen. 4 Wi sisin mua Yeesus teeria-pa unum marew akena ikemik. Ni opora kakenowa nain eliw wiar ikiwowen-i? Naapeya ni opora-ko niar ikainok-na wi sisin mua me wia maakeka. 5 Ni faa, emina-ko me urureman-yon aa. Niena teeria-pa opora-ko niar imenarek nain nia kakenomowa mua ikiwos eliwa-ko me niar ikua-i? 6 Ni teeria fain anane maneka feenap akena oniman, mua oko-ke mua oko opora-pa wuiman. Ne niena teeria me wia maakowa wi sisin mua wapena-pa wiar wuiman.

7 Ni anane opora-pa niam wuiman. Naapeya sira niar amisaremik, ni baliwep me ikaiman. Ni opora-pa me niam wuekaman, sira samora neek nia onuk, nia peeskimep maa neek niar aawuk. 8 Nain ni niena pun pina oniman. Mua oko oram maneka wia peeskimiman. Me wi sisin mua wia oniman, weetak, niena teeria epaskun nain naap niam oniman.

9 Ni fain me amisareman-yon aa. Me niam momoreka, me maeka, “I eliw ikaiyen.” Moram wi mua pina onimik nain Mua Maneka pika kemena-pa me wiar ikaikuan. Feenap onimik nain, wi uruw mia samora, wi miiw inasina ookowa, wi soma orowa, aria wi mua-ke mua oko emeria wia puukowami sira samora wia onowa, wi maa ikum arowa ne wi maa ifemakep aawowa, wi eka kekanowa erua, wi opor samo-samora wia onowa ne mua wia samorami maa wiar aawowa, wi mua nain Mua Maneka pika kemena-pa me wiar ikaikuan. 11 Aria ni iiriw mua papako naap onam-ikeman. Nain yiena Maneka-ke sira samo-samora iiwawun niar iiraremi ona teeria-pa nia wuak. Naemi ni pina marew nia naiya. Nain feenap, yiena Maneka Yeesus Krais-ke umemi nia aawok. Ne Mua Maneka ona Ewar Eliwa nia sesekomaya ni niamiya ikaeya ona kakeniw wiar ikeman.

I mia Mua Maneka-ke ona uuwowa onomeka naep yiek

12 Aria wi feenap maiwkin miimaman nain makena, “Yo maa unowa eliw oninen.” Nain, maa unowa nain me iiwawun yia asipinon. Makena, yo maa unowa eliw oninen, nain yena mia maa mauwa kookalek nain maa nain kema manekiw me ikainen. 13 Ne opora-ko feenap maimik, “Maa enowa-na uroma-pa orowa-ke, ne uroma-na maa enowa ikowa-ke.” Pepek naap maimik, nain ikoka Mua Maneka-ke maa erup nain iiwawun weeser-wuinon. Nain Mua Maneka i mia yiek nain me maa kookalowa muutiw, uruw mia ululkowa nain-ko me yiek, ona uuwowa onomeka naep yiek. Naeya yiena Maneka-ke mia yia kakaltam-ikaeya uuwomiyen. 14 Naeya Mua Maneka i mia kanim onaiya yia iikirowinon, yiena Maneka Yeesus Krais umep ikaeya ona kekanowa-pa iikirowak naap.

15 Aria ni fain pun me amisareman-i? Ni Yeesus teeria-pa wiar ikok niena mia ara o mia ara kuisow areman. Ne naap arep ikok kiremi era emeria wameiya-ko pokowen-i? Weetak akena. 16 Moram ni feenap arowen, era emeria wameiya inemi niena mia kuisow ikowen. Moram Mua Maneka opora-ke iiriw maek, “Mua emeria wameiya pokap-na mia kuisow arikuan.” Ni nain me amisareman-i? 17 Ne ni yiena Maneka wameiya mia kuisow aremi niena kukusa pun iiwawun kuisow arowen. 18 Naapeya ni soma orowa nain neek ikainok. Moram, pina papako onami kukusa niam samorowen, ne pina naap nain onami mia pun niam samorowen. 19 Aria ni fain-ko me amisareman-i? Niena mia-na eena Mua Maneka Ewar Eliwa niar ikaiya nain-ke. Naapeya niena mia ona tempel koora saarik ikeman, me niena kakeniw maa-ke, weetak, 20 Moram Yeesus Krais ni pina muuta nain umemi ni nia sesenarek. Naapeya yiena mia-pa sira eliwa pikiwemkun Mua Maneka unum eliwa aawinon.